2008澳門遊

今年公司大旅行又係去澳門,不過唔同的係坐金光飛行船來回, 不過呢隻船真係唔掂, 裡面的SEAT位係幾好坐, 但一開船就死囉...浪到癲...個船長都唔知點渣船的!!

一落船就去到氹仔, 再搭穿梭巴士去我地住的酒店 - 威尼斯人酒店啦~!

由於未有咁快上到房,所以我地就響酒店內食LUNCH BUFFET打發下時間, 當然公司包架啦~!
食飽飽等上房都等足成個鐘, 真係任食都食唔到咁多啦...! 搞到寶寶唔耐煩走來走去..

終於差不多下午4點先上到房!

寶寶當然好開心啦..走來走去~!

不過我地要把握時間換泳衣去游下水啦, 話晒都5星級酒店丫嘛~!

好! 出發去泳池,由酒店房搭LIFT去5樓, 再行九曲十三彎差不多共200米路程,仲要再搭另一部LIFT先去去泳池, 我地去到LIFT口到最終揀返上房開缸水俾個女玩! 因為果到泳池無LOCKER, 我地又無帶晒D衫褲落去沖身, 一陣玩完咪"水淋水涕"咁行返上房呀? 咁咪有條水痕跟住囉..哈哈~!

不過呢個浴缸無舊年CROWN那個咁大, 所以玩得好迫呀..!

沖完個靚涼, 就落去大運河去睇下"GONDOLA"

跟住我地就去約定的LOBBY到等,齊齊去佛笑樓食晚飯, 由於舊年老闆食完話好, 今年要ENCORE!

不過一上巴士亞女已經訓左, 所以無影相, 亞女訓到食甜品先醒! 都叫做食得爽啦..! 好彩最後個西班牙炒飯, 食唔晒, 剛剛好變成我個女的晚餐~! 食飽飯無節目就跟大隊返酒店睇奧運開幕禮!

返到去酒店同個女沖返個泡泡浴先..平時屋企點都唔會搞架啦~!

睇下寶寶玩得幾開心..!!

跟住...我無野搞...就係最想快D俾個女訓著..但點知我地齊齊都訓左..!

直至清晨5點, 我起左身..叫埋老公齊齊落去賭場打個圈..HEHEE

其實都幾冒險架, 留得個女一個響到! 所以我地只係著左去半個鐘就上返房, 好彩個女無醒到~!

我估我以後都唔敢咁大膽,留低個女一個人...好彩都贏左第二日的洗費!!!

我地第二朝食埋個早餐BUFFET返上房執埋D野就CHECK OUT!

我地無乜特別地方想去, 最想去食好好味的蝦子麵, 點知又去返大三巴!

你地睇下一年前同現在的有幾大分別!

最後我地搵到好好味的蝦子麵係響十月初五街果到架..!

最後我地都係搭返金光飛航返香港!